Bu gün Azərbaycan Yazıçılar Birliyində “Mir literaturı” qəzetinin ilk sayının təqdimat mərasimi keçirilib. APA-nın xəbərinə görə, tədbiri giriş sözü ilə xalq yazıçısı Anar açaraq, Yazıçılar Birliyinin nəşrlərinin sırasına daha bir orqanın qatıldığını bildirib. Bakı Slavyan Universitetinin rektoru Kamal Abdulla, xalq şairi Fikrət Qoca, xalq yazıçısı Çingiz Abdullayev, yazıçı Seyran Səxavət, “Azərbaycan” jurnalının baş redaktoru İntiqam Qasımzadə çıxış edərək, rus dilinin miqyasının Rusiya ərazisindən qat-qat böyük olduğunu vurğulayıblar. “Mir literaturı” qəzetinin ilk sayı mədəniyyət və turizm naziri Əbülfəs Qarayev, Rusiyanın Azərbaycandakı səfiri Vasili İstratov, eləcə də elm və ədəbiyyat xadimlərinin təbrikləri ilə açılır. Qəzetdə Üzeyir Hacıbəylinin “Mühüm məsələ”si, Vaqif Səmədoğlunun şeirləri haqqında material, filologiya elmləri doktoru Həsən Quliyevlə müsahibə, klassik ədəbiyyat nümunələri yer alıb. Qeyd edək ki, 16 səhifəlik “Mir literaturı” qəzeti ayda bir dəfə, rus dilində Ayaz Vəfalının baş redaktorluğu ilə çapdan çıxacaq.

Yazıya səs verin

• (Hələ səs verilməyib)
  
   Loading ...