125 illik yubileyi ərəfəsində Hüseyn Cavidin fransız dilində “Məhəbbətdir ən böyük din” kitabı çapa verilib. Bu barədə APA-ya Hüseyn Cavidin Ev Muzeyinin direktoru Gülbəniz Babaxanlı məlumat verib. Onun sözlərinə görə, şairin əsərlərindən seçmələr əsasında hazırlanan kitabda nümunələr Azərbaycan və fransız dillərində təqdim olunur. Kitabın tərtibçisi və tərcüməçisi Nigar Babaxanova, redaktoru Fransuaz Andriödir. Kitaba ön sözü G. Babaxanlı yazıb. Şairin yubileyinə həsr olunan nəşrlərin sırasında “Hüseyn Cavidin əsərləri”nin 5 cilddə çapı, “Hüseyn Cavidin həyat və sənət yolu” biblioqrafik göstəricisinin nəşri də nəzərdə tutulub. Yaxın günlərdə çoxcildli “Cavidşünaslıq” toplusunun daha bir sayı çapdan çıxacaq. Bu sayda II və III cildlər işıq üzü görəcək. Bu cildlərdə 1900-1937-ci illəri əhatə edən elmi materiallar toplanıb. Tədqiqatçılar, Cavid irsini araşdıranlar üçün qiymətli mənbə sayılan “Cavidşünaslıq” təxminən 15 cilddən ibarət olacaq. Toplunun tərtibçisi Gülbəniz Babaxanova, redaktoru Teymur Kərimlidir. Şairin yubileyi münasibəti ilə daha bir kitab da hazırlanır. “Hüseyn Cavidin hikməti” kitabında şairin beşcildliyi əsasında toplanan hikmətli sözləri, aforizmləri işıq üzü görəcək.

Yazıya səs verin

• (1 səs, təxmini: 5 ilə 5)
  
   Loading ...