Nobel mükafatı laureatı mətbəə rəhbərindən kitab istəyib

“Mən türk yazarı Orxan Pamukam. ”Mənim Adım Qırmızı” romanımı Azərbaycanda yayımlamısınız. Çox sevindim, qürur duydum. Lütfən “Mənim adım Qırmızı”dan beş nüsxə mənə, İstanbula yollaya bilərsinizmi? Sayğılar, sevgilərlə Orxan Pamuk”.Bu sözlər türk yazıçısı, qalmaqallı yazar kimi məşhurlaşan, 2006-cı il ədəbiyyat üzrə Nobel mükafatı laureatı Orxan Pamukun “Qanun” Nəşrlər Evinin rəhbəri Şahbaz Xudoğluna ünvanına göndərdiyi məktubundan götürülüb. Dünya şöhrətli yazar bir neçə ay əvvəl “Qanun” Nəşrlər Evinin daxili imkanları hesabına nəfis tərtibatla çap edilib oxucuların ixtiyarına verilən “Mənim adım Qırmızı” əsərindən ona da göndərməyi xahiş edib. Qeyd edək ki, romanı Azərbaycan türkcəsinə yazıçı-tərcüməçi Nəriman Əbdürrəhmanlı çevirib. Müəllifin “ən rəngli və qorxulu romanım” adlandırdığı bu əsər orta əsr nəqqaşlarının həyatı və naxış sənəti haqqında bənzərsiz hekayətdir. 1591-ci ilin doqquz qarlı qış günündə İstanbulda baş verən bu hekayət ölüm, sənət, eşq barədə orijinal yazıçı təfəkküründən doğulmuş əsərdir. Avropada son qırx ilin ən yaxşı romanı seçilmiş, bir neçə il əvvəl Nobel mükafatından sonra ədəbiyyat üzrə ən nüfuzlu mükafat olan Dublin İMPAC ödülünü qazanmış “Mənim adım Qırmızı” əsəri Azərbaycan oxucusunun da çoxdan gözlədiyi töhfədir.
Qeyd edək ki, Ş.Xudoğlu mətbuata açıqlaması zamanı N.Əbdürrəhmanlının çevirməsində O.Pamukun “Qara kitab” romanını da nəşr etmək fikrində olduğunu bildirib. /Yeni Musavat/

Yazıya səs verin

• (1 səs, təxmini: 5 ilə 5)
  
   Loading ...