Elnur ASTANBƏYLİ

molodoy25@box.az

Bu həftə rayona getmişdim. Əyalət camaatının xasiyyətidir, Bakıdan gələnləri Nostradamus hesab edirlər. Hamı mənə eyni sualı verirdi: «2008-ci ildə nə olacaq?». Aydındı ki, söhbət prezident seçkilərindən gedir. Açığı, daha məndə belə suallara, məsələn, 2003-cü ildə olduğu kimi, ümid və ehtiras dolu cavab vermək həvəsi qalmayıb. Hətta «hər şey yaxşı olacaq, gələn il irticanı tarixin arxivinə göməyəcəyik» desəydim də, inanan olmayacaqdı. Çünki adamlar əvvəlki kimi sadəlöhv deyillər. O üzdən də əyalət adamlarının bu suallarına eyni cavabı verirdim: «Mən hardan bilim nə olacaq?». Qoy canları çıxsın, özlərinin, övladlarının gələcəyini Qorxmaz Əlilinin torbadan çıxardığı lotoreya daşlarına bağlamaqdan vaz keçib, bayağı teleseriallardan, düşük teleşoulardan, ulduz yarışmalarından vaxt tapıb özləri cavab axtarsınlar.
Biz isə qayıdaq Bakıya. Burada «2008-ci ildə nə olacaq» sualına çoxlu cavablar tapmaq mümkündür.

Flora Kərimova və İsmayıl Ömərov

Onlardan biri vaxtilə Əliyevlər rejiminin ən sərt tənqidçisi idi, digəri bu hakimiyyətin ən murdar məddahı. Əslində İsmayıl Ömərovda heç nə dəyişməyib, elə əvvəlki yaltaq, müti İsmayıl Ömərovdur, hələ üstəlik, «İctimai Televiziya» adı altında tayfa telekanalını idarə edir. Hətta Az. TV belə son vaxtlar İTV-dən daha obyektiv təsir bağışlayır adama.
Amma Flora Kərimova… Mən bu xanım müğənninin İTV-nin saytında İsmayıl Ömərova yağdırdığı tərifləri oxudum, matım-qutum qurudu, əl-ayağım yerdən-göydən üzüldü. Flora Kərimovanın oxumaması oxumasından daha funksional idi, daha ictimai yüklü idi. İndi nə var-nə var, İsmayıl Ömərov onu bir-iki dəfə efirə çıxaracaq deyə, bu adamın çirkli keçmişinə göz yumub, vaxtilə müxalifəti küçə söyüşləri ilə təhqir etməsini unudub haqqında «dəyərli ziyalı», «vicdanlı insan» kimi bəlağətli ifadələr kullanmaq yumşaq desək, ayıbdır.
Bundan sonra Flora xanım istəyir gündə beş dəfə İTV-yə çıxıb yanıqlı-yanıqlı oxusun, nə mənası var? Oxumayanda bizə daha çox lazım idi.

Xalid Əlimirzəyev hardadır?

Vaxt vardı hansı qəzeti açırdın onu görürdün. Hakimiyyətin qabırğasına xoruz səsi eşitməyən, ən radikal tənqidləri Xalid Əlimirzəyev döşəyirdi. Amma bir ildir ki, Xalid müəllimin səsi çıxmır. Bu bir ildə nə baş verib axı? Hakimiyyətin mahiyyəti dəyişib bəlkə? Bəlkə avtoritarizmi hüquqi demokratik dövlət əvəzləyib? Bəlkə Azərbaycanda ədalətli vətəndaş cəmiyyəti qurulub, bizim xəbərimiz yoxdur?
Əlbəttə, bunların heç biri baş verməyib, bəs onda Xalid Əlimirzəyev hardadır? Elə ki, Xalid müəllimin kürəkəni Müdafiə Nazirliyində yüksək vəzifəyə gətirildi, bu müxalifət ziyalısı da səsini kəsdi. İndi onu axtarıb-tapmaq, hakimiyyətin hansısa özbaşınalığına bir cümlə münasibətini öyrənmək müşkül məsələdir. Doğrudan da, insan əvvəl-axır özü olurmuş…

Ramiz Rövşən və Vilayət Eyvazov

Ramiz Rövşənin geniş təqdimata ehtiyacı yoxdur, allah qoymasa, guya müxalifət ziyalısıdır, Vilayət Eyvazovu isə «Viloş» kimi hamı tanıyır, hakimiyyətin cəza maşınının ən qəddar, ən amansız sürücülərindən biridir. Sual doğa bilər: bəs indi onları «və» bağlayıcısı ilə bir-birinə qovuşduran nədir? Desəm inanmazsınız, Ramiz Rövşən və Vilayət Eyvazov eyni filmə məsləhətçi təyin olunub. Film daxili işlər naziri Ramil Usubovun sifarişi ilə çəkilir, özü də Azərbaycan polislərinin qəhrəmanlığından, şücaətindən bəhs edəcək. Demək artıqdır ki, Azərbaycan polisinin şücaəti cibə nəşə atıb adam tutmaqdan, mitinqçiləri eşşək balası kimi çırpmaqdan o yana keçmir. İndi Ramiz Rövşənin belə bir filmə, özü də Vilayət Eyvazovla çiyin-çiyinə məsləhətçilik etməsi heyrət doğurmaya bilməz. Vilayət Eyvazov 2003 seçkilərində səslərinin oğurlanmasına etiraz edən ləyaqətli insanlara divan tutub, onları «Azadlıq» meydanından az qala erməniləri Qarabağdan qovurmuşcasına vəhşiliklə döyüb çıxarandan sonra Ramiz Rövşən repressiyalara qarşı mübarizə komitəsinə sədr olmuşdu, hakimiyyətin «viloş»ların əli ilə cəzalandırdığı, demokratiya savaşına qalxan insanları müdafiə edirdi. Aradan bir neçə il keçib və indi Ramiz Rövşən həmin «Viloş»la birgə demokratiya savaşına qalxan insanları mitilinə çırpan polislər haqqında filmin məsləhətçisidir! Yazıqlar olsun! Mənim başından bəri açıq-aşkar hakimiyyəti müdafiə edən Zəlimxan Yaqublara, Anarlara, Bəxtiyarlara hörmətim birə-beş artdı.
Ən əsası isə, bütün bunlardan sonra doğrudanmı, bilmək çətindir ki, 2008-ci ildə nə olacaq?

Yazıya səs verin

• (6 səs, təxmini: 3.67 ilə 5)
  
   Loading ...