“Yeni Dalğa” Prodüser Mərkəzində istehsal olunan “Cavid ömrü” iki seriyalı bədii filmi və “Qrinviç meridianından kənarda” qısametrajlı bədii filmi Avstraliyada keçiriləcək beynəlxalq film festivalında ölkəmizi təmsil edəcək. Bu barədə APA-ya məlumat verən “Yeni Dalğa” Prodüser Mərkəzinin direktoru Rasim Həsənov bildirib ki, filmlər ilk öncə festivalın Qafqazdakı təşkilat komitəsinə göndəriləcək. Daha sonra sentyabrın 4-də filmlərin festivalda iştirakına icazə veriləcək. R. Həsənov onu da vurğulayıb ki, bu festivala vəsiqə qazanan filmlər CNN telekanalında nümayiş olunmaq imkanı əldə edəcək. Belə ki, artıq neçə illərdir keçirilən bu festivalda iştirak edən filmlər məhz həmin kanalda bütün dünya ictimaiyyəti üçün nümayiş etdirilir.
Qeyd edək ki, Anarın ssenarisi əsasında Ramiz Həsənoğlunun quruluş verdiyi “Cavid ömrü” filmi dövlət sifarişi ilə istehsal olunub. Filmdə Hüseyn Cavid rolunu Rasim Balayev, İblis rolunu Məmməd Səfa, Mircəfər Bağırovu Ramiz Novruz, Müşkünaz rolunu isə Dilarə Əliyeva canlandırıb. “Qrinviç meridianından kənarda” filminin rejissoru Yusif Quliyev, ssenari müəllifi isə Kamran Qasımovdur.

Yazıya səs verin

• (Hələ səs verilməyib)
  
   Loading ...