ELNUR ASTANBƏYLİ

molodoy@box.az

«Vacib deyil ki, insan öz ömrünü bütövlükdə ən böyük Şər qüvvənin məhvinə sərf etsin - onun başqa qayğılarla yaşamağa da haqqı var. Amma hər kəsin borcudur ki, Şər qüvvədən heç olmasa, uzaqlaşmağa çalışsın, ona yardım göstərməsin»
Henri Toro

Azərbaycan ziyalısının sifəti haqqında çox yazmışıq. O, xislətcə karyeristdir, qorxaqdır. Etiraz hissi ona yaddır. Azərbaycan ziyalısı o vaxt etiraz edir ki, öz adını hansısa prezident təqaüdü və ya fəxri ad siyahısında görmür. Kiçik istisnalarla (bəstəkar Cavanşir Quliyev, şair Məmməd İsmayıl) Azərbaycan ziyalılarının hamısı bir bezin qırağıdır. Onları ölkəni bürümüş rüşvətxorluq, saxtakarlıq, özbaşınalıq, səfalət və cəhalət düşündürmür. Azərbaycan ziyalısı üçün qarın qardaşdan, «Şöhrət» ordeni şərəfdən, prezident təqaüdü ləyaqətdən irəlidir. Biz bunları yüz dəfə, min dəfə yazmışıq. Bundan sonra on min dəfə, yüz min dəfə yazacağıq. Çünki yaltaqlığı, sabunlamağı, karyeristliyi özünün həyat tərzinə, yaradıcılıq məqsədinə çevirmiş Azərbaycan ziyalısı hörmət və ehtiramdan başqa hər şeyə layiqdir.
Gələk Rasim Balayevə. Mən Azərbaycan çapında çox məşhur olan bu aktyorun əsl sifətini Polad Bülbüloğlu mədəniyyət naziri vəzifəsindən uzaqlaşdırılanda gördüm. Nə qədər ki, Polad nazir idi, susurdu. Elə ki, o, vəzifədən getdi, başladı Bülbüloğlunu Azərbaycan mədəniyyətinin evini yıxmaqda ittiham etməyə. Yıxılana balta çalmaq qəhrəmanlıq deyil. Sonra Əbülfəz Qarayev nazir oldu. Rasim Balayev başladı onun nazir təyinatını alqışlamağa. Onda hələ Əöülfəz Qarayev heç bircə gün yeni işinə çıxmamışdı. Sonra Əbülfəz Qarayev rejissor Vaqif Mustafayevi müavinlikdən uzaqlaşdırdı. Bu dəfə də Rasim Balayev başladı Vaqif Mustafayevin kölgəsini qılınclamağa. Onu Azərbaycan kinosunu məhv etməkdən suçladı. Heç Kim də soruşmadı ki, hörmətli aktyor, niyə bunu Vaqif Mustafayev nazir müavini olanda demirdiniz. Hətta bir ara qəzetlər Vaqif Mustafayevin üstünə düşəndə Rasim Balayev onun müdafiəsinə də qalxmışdı. Rasim müəllim, Vaqif Mustafayev vəzifədən gedəndə onu nənəm də tənqid edərdi. Hünəriniz vardı, Mustafayevi müavin olanda tənqid edərdiniz. O boyda Beyrək, Babək, Nəsimi obrazlarını yaratmasınız. Belədə qeyri-səmimilik olar? Allaha şükür ki, siz Yalıncıq, Səhl Sumbat rollarını oynamamısınız, yoxsa indi nə işlər çevirirdiniz, kim bilir.
Oxucuya sevimli aktyorunun bu kökə düşməsinin səbəbi maraqlı görünə bilər. Səbəb çox sadədir: Rasim Balayev Polad Bülbüloğlunun, V. Mustafayevin gedişinə, Ə. Qarayevinsə gəlişinə ona görə sevinirdi ki, könlündən nazir müavinliyi keçirdi. Amma bu istəyi baş tumadı. Bir neçə gündür Rasim müəllim Əbülfəz Qarayevin qabırğasına döşəməyə başlayıb. Nazirin «Azərbaycanfilm» kinostudiyasının 4 hektar ərazisini satması həm də Kinematoqrafçılar İttifaqının katibi olan Balayevi guya əsəbləşdirib. Amma Rasim müəllimin Ə. Qarayevi tənqid etməsinin, ondan prezidentə şikayətlənməsinin alt qatında şəxsi qisasçılıq hissi dayanır. O, nazir müavini təyin olunmamasını heç cür bağışlaya bilmir.
Bir ölkənin ki, mədəniyyət naziri Əbülfəz Qarayevdir, o ölkədə hansı mədəniyyətdən danışmaq olar. Bu cavabı özündə olan sualdır. Amma orası da var ki, bizim ölkənin özünü ciddi mədəniyyət xadimi hesab edən adamları karyera xəstəliyinə düçar olubsa, şər qüvvənin yaltağına, məddahına çevrilibsə, bütün yaradıcılığını «Şöhrət» ordenininə, Fəxri Xiyabana, prezident təqaüdünə hesablayıbsa, o ölkənin mədəniyyət naziri də elə Əbülfəz Qarayev olmalıdır.
Rasim Balayev ölkədə bu qədər haqsızlıq baş verir, dözürsünüz, susursunuz. Amma elə ki, öz maraqlarınıza toxunurlar, başlayırsınız asıb-kəsməyə. Zatən Azərbaycan ziyalısının problem də budur. Bir neçə il əvvəl İtaliyada 300-ə yaxın mədəniyyət və incəsənət xadimi yaradıcılıq azadlıqlarının pozulmasına etiraz etdi. Avropanın sivil ölkələrinin birində yaradıcılıq azadlığının pozulmasından şikayətlənmək təəccüblüdür, deyilmi? Elə İtaliyadakı həmkarlarımız da həmin etiraz edən mədəniyyət xadimlərindən birindən bunu soruşub. Həmin İtaliya ziyalısı bilirsiniz, öz etirazlarını necə əsaslandırıb? Çox sadə: «İtaliyaya Berluskoni kimi mafiyaya bağlı, rüşvətə bulaşmış, zövqsüz və gerizəkalı bir adamın başçılıq etməsi elə bizim yaradıcı azadlığımızı məhdudlaşdırmaqdır».
Bax belə…

Yazıya səs verin

• (3 səs, təxmini: 3.67 ilə 5)
  
   Loading ...