Muğam ustası, mərhum xanəndə Səxavət Məmmədovun bütün ifalarından ibarət olan “Görkəmli Azərbaycan xanəndəsi Səxavət Məmmədovun səs xəzinəsi” adlı musiqi albomu hazırlanır. Albomun II nəşri olan “Səxavətli muğamlar” Kiyev şəhərində artıq işıq üzü görüb. Bu barədə APA-ya layihənin koordinatoru Əlyar Məmmədov məlumat verib. O bildirib ki, yüksək keyfiyyət və tərtibatı ilə seçilən “Səxavətli muğamlar” Ukraynanın nüfuzlu studiyalarının birində hazırlanıb: “Prodüseri Burzu Əliyev, redaktoru Qulu Ağsəs olan musiqi albomu tezliklə Azərbaycana gətiriləcək. Səxavət Məmmədovun doğum günü - oktyabrın 23-də diskin təqdimat mərasimi keçiriləcək. Tədbirdə Azərbaycanın görkəmli muğam ifaçıları və biliciləri, KİV nümayəndələri, eləcə də xanəndənin vaxtilə rəhbərlik etdiyi “Qarabağ” ansamblının üzvləri iştirak edəcəklər”. Qeyd edək ki, “Görkəmli Azərbaycan xanəndəsi Səxavət Məmmədovun səs xəzinəsi”nin I nəşri olan “Azad bir quşdum” diski də 2003-cü ildə Kiyevdə nəşr edilərək muğamsevərlərə pulsuz paylanmışdı.

Yazıya səs verin

• (Hələ səs verilməyib)
  
   Loading ...