Azərbaycanlı şair daha bir neçə nüfuzlu şeir festivalına dəvət alıb

Tanınmış şair Qəşəm Nəcəfzadənin ədəbi taleyində 2007-ci il çox uğurlu bir il kimi qaldı. Belə ki, ötən il şairin rus, ingilis və azərbaycan dillərində yayımlanan internet saytı fəaliyyətə başladı. Bakıda ingilis və rus, həmçinin Hollandiyada ingilis və holland dillərində kitabları çap olundu, Hollandiyada keçirilən beynəlxalq şeir festivalının finalına vəsiqə qazandı və 23 dünya şairinin təmsil olunduğu, ingilis dilində dərc olunan “Poetry international” antologiyasında həmyerlimizin də şeirləri yer aldı. Bütün bunlar şairin  dünya poeziyasınıa çıxışı üçün bir körpü rolunu oynadı.  2008-ci il də Qəşəm Nəcəfzadə üçün uğurlu başlayıb.
Belə ki, yanvar ayında şairin 30 şeiri məşhur Belçikali şair və tərcüməçi Jean Marie Flemal tərəfindən fransız dilinə tərcümə edilərək,  həmin olkədə dərc edildi və dünya şairlərinin təmsil olunduğu www.poesiedumonde.com ədəbiyyat  saytına yerləsdirildi. Tərcüməçi bu şeirləri şairin internet saytından götürüb.
Daha bir tərcümə xəbəri isə Tamil Unversitetinin akademiki Mullai Adhavan dan gəldi. Cənab Adhavan Q.Nəcəfzadənin bir neçə şeirini Tamil dilinə çevirərək yayımlayıb. Xatırladırıq ki, Tamil unversiteti Şri-Lankada yerləşir və Tamil dilində 77 milyon əhali danışır, bu dil Hindistanin bir hissəsini, Şri-Lankanı, Sinqapuru, Malaziyanı əhatə edir.
Bundan əlavə Qəşəm Nəcəfzadənin  bir nece şeiri bu ilin əvvəlində  Amerikalı naşir  Marlow Peerse Meaver  tərəfindən  “Yeni dünyanın şairləri” antologiyasına daxil edildi. Alban şairəsi Rozi Theotori Qəşəm Nəcəfzadənin bir nece şeirini Alban dilinə tərcümə etdi.
Sevindirici haldır ki, Qəşəm Nəcəfzadəni bu il iyul ayının 5-12 də Kolumbiyada keçiriləcək  18-ci Beynəlxalq  Poeziya Festivalına rəsmi şəkildə dəvət ediblər. Şairin dediyinə görə, bu il Beynəlxalq Festivallara başqa ölkələrdən də- Şotlandiyadan, İsraildən və Afrikadan ona müraciətlər olub.
Söhbətimizin sonunda şair onu da vurğuladı ki, bu festivalların xronikasina baxıram,  hələ oralara bir  Azərbaycan şairinin ayağı dəyməyib: “Ona görə də mən dostlarımın şeirlərini də bir cox xarici ölkələrə gondərmişəm. Hal- hazırda dünyanın aparıcı ölkələrindən 30-dan cox şairlə məktublaşıram, onlar məni tərcümə edir, mən də onların bəzilərini hal-hazırda  tərcümə etməkdəyəm. Düşünürəm ki, dünyada xeyli oxucularım var  Bir sözlə, xarici dillərdə şeirlərim özlərini yaxşı hiss edirlər.”

Kultaz

Yazıya səs verin

• (1 səs, təxmini: 1 ilə 5)
  
   Loading ...