ALOV. Şeirlər.
Yazar: Admin | Bölmə: Ədəbiyyat | Tarix: 26 Şubat, 2008
Çox sınmayan qozlar gördüm,
içini qurdlar yedi.
***
Ehtiyat igidin yaraşığıdır.
Ona görə igidlərimiz
bu qədər yaraşıqlıdır
***
Etdiyi yaxşılığa
o qədər minnət qoydu,
minnətdarlıq etməyə
yer qalmadı
***
O, yumurta kimidir.
Qabığının altında
yup-yumşaq ürəyi var
***
Allahın istefa vaxtı
çoxdaaan çatıb.
***
Hamıyla yola gedənin
öz yolu da varmı görəsən?
***
Uşaqlar sındıra bilmədiklərini sevmirlər.
Elə böyüklər də…
***
Sevgi min dildə min cürdür.
Sevginin dili bir cürdür.
***
Şəhər
süni işıqlarıyla
elə parlayırdı ki,
ulduzlar küsüb
geri çəkildilər
***
Acıq duyğusundan
acığım gəlir…
***
Zaman…
həbs olunur fotolarda
***
Səhra məmləkətimdə
azadlıq ilğımı…
***
Kədərin üzünə gülümsədim
Qondu üzümə
***
Liftin güzgüsündə
qoca və yorğun görünən qadın
duzsuz bir komplimentə
gülümsədi
***
Ey Od!
Pambıq olum,
ya su?
***
Mənə qarışqa gücü arzula
Qarışqa əməyi deyil
***
Bu adam ilan kimi
başdan-ayağa quyruqdu
***
Əgər bircə damcı su
Qarışqanı boğursa,
Okeandır ki var.
***
Bu çiçəklər bu an
o qədər gözəldi ki,
istəməzdim üç gün sonra
bir də görüm onları
***
Hamıya xəbərləyəcəm
sənin nə qədər
yaxşı adam olduğunu
***
İnsanlar bu qədər fərqliykən
skeletlər nədən bu qədər
bir-birinə bənzərlər?
***
Buludların üstündə yatmaq
Göy qurşağının altından keçmək
Uçan quşlara qoşulmaq
Daha nələr və nələr…
Nakam uşaqlıq arzularım
Göylərdə gözüm qaldı
***
Təkcə qanad arzulamıram ki.
(Milçəyin də qanadları var)
***
Bu kəndin qadınları
ərlərini rus puluna
dəyişirlər hələ də
***
Noolar iltifat edin
Bu üzü yanıq qızı görməyin…
***
Gör ha!
Bostandakı müqəvvalar da
qadın yox, kişi paltarında olur.
Kişi zəhmi
burada da yarayırmış
Yazını dostuna göndər
| 
Yazını Çap et
| 816 oxunma | 9 Şərh var
(2 səs, hardasa: 3,00 ilə 5 arası)
Loading ...
Loading ...
Yüklənir...
gözəl şeir, müdrik aforizmlərdir bu misralar. Mənə yapon hokkularını xatırlatdı. Əhsən!
Bir neçəsi xaric, maraqlıydı.
Uğurlar!
“Allahın istefa vaxtı
çoxdaaan çatıb.” (?!) da artıq korlamısınız…
Amma bəziləri pis deyildi.
Maraqlıdı, amma fərqli deyildi ee… Üstəlik, bəzi fikirlər artıq deyilmişdi.
Hər halda, uğurlar!
çox maraqlıydı.
Allahın istefa vaxtı çoxdan çatıb daha maraqlıydı.Təbriklər.
bunlar sheirdirse men shairem.
Bir hekayə ilə deyilə biləcək fikir bir-iki misra ilə deyilir Alovda. Asif Ata demiş, “söz azlığı, fikir çoxluğu” . Önəmli olan budur, məncə.
Uğurlar!
heleki yeniyem ama haqqinda esiddiyim en gozel sayitlardan biridi bura
Alov xanıma uğurlar arzulayıram, gene yaxıb-yandırır adamı…