Qaf dağına zəncirlənmiş qadın

Tanrı Həvvanı kişidən sonra yaratdı. Adəm darıxmamaq, tənhalıqdan üzülməmək üçün. Beləcə qadın əslində yaranmış boşluğu doldurmaq üçün, kişini əyləndirmək, oyuncağı olmaq üçün yaradıldı. Qabırğadan yaradılan Həvvaya Tanrı bir o qədər də dıqqət ayırmadı, «Barbie»-nin hazırlanmasına ondan daha çox əmək sərf edilmişdi. Əgər qadın kişinin deyil, tutaq ki, atın qabırğasından yaradılsaydı, o zaman qadında daha çox atın xüsusiyyətləri olacaqdı. Ən müasir düşüncəylə desək,
«Dolli» olacaqdı. Lakin o kişinin qabırğasından yaradıldı. Həvva ilk klondur. Adəmin klonu. Tanrı Həvvada bir-iki əlavələr və ixtisarlar aparmaqla Adəmin surətini, qadını - kişinin oyuncağını, «female doll» - «silikon sevgili» yaratdı.
Tanrı üçün qadın -  Həvva o qədər də əhəmiyyətli yaratıq deyildi.
«Sadəcə Adəmi əyləndirsin, yetər». Tanrı Adəmi yaradarkən bundan artığını düşünməmişdi. Bəzən sənin üçün bir o qədər dəyərli olmayan bir şey hazırlayarkən qarışığı qədərindən fərqli qatırsan. Qədim insanlar əti əvvəl yanar ocağa, sonra közə tutmaqla kabab bişirməyi öyrəndikləri kimi. Beləcə Tanrı fərqinə belə, varmadan kişidən daha mükəmməl bir varlıq yaratdı.
Bu dəfə hər şey Tanrının düşündüyü kimi olmadı (tanrılar da yanılırlar..? ). Həvva anladı ki, oyuncaqdır. Sadəcə və sadəcə Adəmin əylənməsi və üzülməməsi üçün yaradılmış həzz makinası.
Lakin o əyləncə makinasının sahib ola biləcəyi məziyyətlərdən daha artığına malikdir (Tanrı bunu nəzərə almamışdı). Həvva da  Adəm kimidir. O da yeyir, içir, cüzi fərqləri çıxmaqla oxşar bədən quruluşları… o da insandır… o da ibadət edir. Bəs niyə axı tanrı da onu sevmir, heç Adəmə göstərdiyi diqqətin tozu belə, ona göstərilmir. Tanrı onunla kəsmət kəsmir. Adəm xoşbəxtdir, ibadətini edir və əylənir, Həvvaya isə hər gecə «female doll» olmaqdan başqa bir şey qalmır.
Adəmin beyninin ucundan belə, keçməyən bir məsələ Həvvanın beynini yeyib qurtarmaqdadır. O elə hey düşünir. Niyə axı bu lənətəgəlmiş meyvəni yemək olmaz, niyə ondan başqa hər şeyi olar, ancaq onu yox. Adəm isə susur. «Olmaz»- Adəm bircə bunu  bilir. Tanrı belə  buyurub. Vəssalam.
Bütün müqqəddəs kitablar kişilər üçün yazılıb. Onlarda qadın üçün nəinki bir fəsil, heç bir abzas, bir səhifə, bir cümlə, bir hərf belə tapa bilməzsən. Tapmaq mümkün də deyil. Ya tanrı sonradan dərk edib ki (səhfini anlayıb), onsuz da qadın onlarda yazılanları bilir, ya da hələ də qadına dəyərsiz bir şey kimi baxır. Tanrı öz kitablarında yazır ki, insanı (xala xətrin qalmasın deyə «insan» yazıb, yoxsa o məmuniyyətlə «insan» yerinə «qadın» kəliməsini işlədərdi) faili-muxtar, filan-bəsməkən… -dır-dir-dur-dür… bəşərin əşrəfidir. Qadın kişi ilə tanrı arasında dayanmış… artıq özünüz qərar verin yarıtanrıdır, mələkdir (bu qadın üçün deyilmiş ən yanlış bənzətmədir, o zahirən belə, mələkdən daha yüksəkdədir), zatdır, ya nədir. Tarix boyu düşünürlərin beynini belə bir məsələ məşğul etmişdir; «Nə üçün qadın filosoflar olmayıb və ya barmaqla göstəriləcək qədər azdırlar?». U.Eko yazır: «Mən bu gün mövcud olan fəlsəfə ensiklopediyalarını vərəqlədim, orada Hipoteyadan başqa bir qadın filosofun da adına rast gəlmədim. Məsələ onda deyil ki, bütün Tarix  ərzində mövcudluq və dünyanın quruluşu barədə düşünən qadınlar olmayıb, sadəcə, ola bilsin, kişi filosoflar bütün fəlsəfi tapıntıları öz adlarına yazmaqla onları yaddan çıxarmağa üstünlük veriblər». Platon, daha sonralar isə Əli İbn Əbutalib yazır: “Özünü dərk etməsən tanrıları (tanrını) dərk etməzsən». Təbir-caizsə kişi filosoflar tanrını dərk etməyə can atıblar (fəlsəfənin qayəsi tanrını dərk etməkdən ibarətdir). Qadın üçün isə buna gərək yoxdur, çünki onun cövhərində tanrılıq var, o kişiüstü varlıqdır.
Dini kitablarda söylənildiyi kimi heç də İblis Həvvanı yoldan çıxararaq Adəmi yasaq meyvədən yeməyə təhrik etməmişdi. Həvva İblisdən öncə bu haqda düşünmüşdü. İblis isə Həvvanın heç əlinə su tökməyə yaramazdı, mələklər də.
Bəzən düşünülmədən yaradılan digərlərindən daha üstün və təhlükəli olurlar. Həvva kimi.
Mükəmməlliyin qarşısında Tanrıdan nəvaziş görməmək Həvvanı qeyzləndirirdi. Tanrını dərk etmiş Həvva bütün zamanların ən böyük filosofudur, Həvva mükəmməldir. Tanrı isə onunla hesablaşmır, onu aşağılayır. Sayğı duymur. Bu yerdə tək şey qalırdı…  intiqam. Özü də tezliklə. Qadağan olunmuş meyvəni yemək lazım idi…XXXXAAARRRÇÇÇÇÇÇ…
Tanrı yenə də  öz sevimli Adəminə qarşı mərhəmətli oldu. O yalnız sürgün olundu. Həvva isə həm sürgün olundu, həm də…
Əgər  Prometey qadın olsaydı Zevs ona yalnız bu cür cəza verərdi; Qaf dağına zəncirlənmiş Prometey hər gün doğar, qartal da körpəni yeyərdi.

Yazıya səs verin

• (1 səs, təxmini: 1 ilə 5)
  
   Loading ...