Elnur Astanbəyli

molodoy25@box.az

Bəli, bu həftə də yazımızın iki qəhrəmanı var: Anar və Seymur Baycan. Öncə Anardan başlayaq. Ona görə yox ki, ağsaqqaldır, gözlətmək yaxşı düşmür. Yox.  Ona görə ki, nə qədər olmasa, Anar ortabab yazıçıdır, «Dantenin yubileyi», «Mən, sən, o və telefon» kimi bir-iki alababat əsəri var, özü də Anar bunları yazanda elə Seymur yaşda olub. Seymur isə… Yaxşısı budur, Anarı yola verək sonra.Anar 70 yaşı ilə bağlı APA-ya müsahibə verib. Öz iç üzünü bir daha açıb. Məsələn deyib ki, «yenidən dünyaya gəlsəydim, bəzi səhvlərimi təkrar etməzdim». Anar hansı səhvlərdən danışır? Onun səhvləri yox, xəyanətləri var. Milli hakimiyyətə arxa çevirməkdən tutmuş «Qalib gəldi, qalib getdi» yazısınadək Anar hansı xəyanətləri etməyib xalqa? Əlindəki bütün imtiyazları istedadlı gəncləri əzmək, səfil kökə salmaq üçün kullanan adam səhv yox, ədəbiyyata xəyanət edib.
Anar daha sonra deyir: «Ömrü boyu iqtidarda olan adamlara mükafat verməklə məşğul olan telekanal jurnalisti yazıçıları günahlandırır ki, onlar iqtidardan nə isə umurlar». Aydındır ki, ANS-i və Mir Şahini nəzərdə tutur. Yaxşı arqumentdir. Amma az sonra özü mərhum və indiki prezidentlərə yenidən köpüklü təriflər yağdırmaqla məddahlığın, yaltaqlığın qanınadək işlədiyini göstərir.
Anarın «Cavid ömrü» filmi haqqında bəlağətlə danışması ümumiyyətlə, biabırçılıqdır. Bu adam «Qəm pəncərəsi» filmi ilə Mirzə Cəlili, «Uzun ömrün akkordları» ildə Üzeyir Hacıbəyovu necə urvatsız eləyibsə, «Cavid ömrü» filmi ilə də Hüseyn Cavidi eləcə rüsvay eləyib. Bu filmə baxandan sonra heç bir ağıllı köpəyoğlu gedib Cavid əfəndinin kitablarının üzünü açmaz. Anar deyir ki, «film hələ çəkilməmişdən əvvəl ona qulp qoyulurdu». Doğrudu. Qulp qoyanlardan biri də mən olmuşam, ««İblis»i Anardan qoruyun!» başlıqlı bir neçə yazı yazmışam. Burda təəccüblü nə var ki? Anarın ssenarisi əsasında çəkilən bir filmin Cavid əfəndinin ruhuna, yaradıcılığına həqarət olacağını əvvəlcədən bilmək üçün heç də adamdan Nostradamusluq tələb olunmur.
Necə ki, Seymur Baycanın yeni yazmağa başladığı romanının da istedadsızlıq nümunəsi olacağını bilmək üçün İlham Mirzəyevin yanına getmək lazım deyil. Bəli, düz eşitdiniz, Seymur müəllim yeni roman yazır. Guya «18, 6 sm» adlı son romanından çox yarımışdıq, qalmışdı yeni romanı. A qardaş, zor deyil ki, bu ədəbiyyat zibil səndə alınmır da. Gərək mütləq yazasan? Otur köşələrini qarala, qonorarını al, hərdənbir Ermənistana, mütəmadi Qaxa get, yaşa özünçün. Hansı axmaq sənin ağlına salıb ki, yazıçı olmalısan. Pis əsər yazmaq üçün də adamdan istedad tələb olunur, o da səndə yoxdur. İndiyədək allah qoymasa, iki roman yazmısan, onlardan mənə bir dənə yazıçı cümləsi göstər, gedib siçan dərmanı içib özümü öldürməsəm, bu köşənin qonorarını sənə halal eləyirəm. Seymur, istedadlı yaşıdlarına yazığın gəlsin, onları AYB-nin qoca-qoltaq üzvlərinin yanında dili gödək, dalı kösöylü eləmə. Onsuz da sənin son romanından sonra hər yerdə danışırlar ki, «biz deyəndə bu cavanlar heç nə yaza bilmir, inanmırdınız, indi görürsünüz cümlə də qura bilmirlər». 
Bu yazımızın qəhrəmanı həm də Anar olduğundan, türkün sözü, bir hatırlatma yapeyim. Anarın yazıçılar haqqında bir hekayəsi var. Həmin hekayənin obrazlarından biri Sirkə Badımcandır. Sirkə Badımcanın prototipi isə Seymur Baycandır. Sabun mücəssiməsi Cahan Gir Məmmədlinin intellektual qəzet adlandırdığı «525-ci qəzet»in baş redaktoru, Azərbaycan reallığında heç bir istedad və intellekt göstəricisi olmadan hər cür imtiyaz qazanmağın mümkünlüyünü sübut etmiş Rəşad Məcidə inansaq, Seymur Baycan dəfələrlə onun yanında Anarın onu Sirkə Badımcan obrazında təsvir etməsindən sevinə-sevinə danışıb, qürurlanıb. Adamın yadına məşhur «şah məni dindirdi» lətifəsi düşür.
Seymur həmişə hakimiyyəti və onun yaltaq, məddah ziyalılarını o vaxt söyür ki, yeyib-içməyə pulu olmur. Mən ölü, siz qalı, vaxt gələcək o, deputat da seçiləcək, «Şöhrət» ordeni də alacaq, Prezident Aparatından zəng eləyib yubileyini təbrik etmədiklərinə görə inciyəcək də. Sadəcə, hələ yaşı düşmür.
Anarı isə «Qalib gəldi, qalib getdi» yazısına görə qınamağa dəyməz. Çünki bu yazını əvvəl-axır Seymur yazacaqdı…

Yazıya səs verin

• (2 səs, təxmini: 5 ilə 5)
  
   Loading ...