Bu dəfə   Əyyub Qiyasın  yolu düşdü “Bayatı” kitab mağazasından. Daha doğrusu, aman-zaman “Sonuncu büt”ünü yanına salıb qələm dostarının, oxucularının hüzuruna təşrif gətirdi. ”Ulduz” jurnalının “qərargah-redaksiya”sı sayılan Elçin Hüseynbəylinin otağında yazıçı dostu ilə dərdləşəndə əlbəyaxa olduğu kefsizliyi, qaşqabağlı halı olsun ki, “sonuncu büt”ündən sarı nigarançılığını göstərirdi. Əl  verib görüşəndə “dərya-gəmi”  məsəli yadıma düşsə də, sumqayıtlı dostlarını görəndə yerinə gələn ürəyinə su çiləyib rahatlaşdığı hiss olunurdu.

Bir də onda xəbərim oldu ki, şair dostu Qulu Ağsəslə nəyi isə bölüşdürə bilmirlər. Maraqlı gəlsə də nəyin davasını etdiklərini qəsdən soruşmadım. Reportaj məsələsini başa düşəndə bir ağızdan özləri danışdılar. Sən demə, Qulu Ağsəs “cığallıq” edib Əyyub müəllimi yarı yolda qoymaq istəyirmiş. İşi olduğunu bəhanə gətirəndə Əyyub Qiyas da dostunun ikiəlli tutduğu kitabı imzalamaqdan imtina etdi. Hətta Qulu müəllim ona “ kitabın birinci alıcısı mənəm e“ desə də…  Deyəsən, sonradan kompromisə gələ bildilər .

“Sumqayıt diasporu”nun nümayəndələri kölgəyə çəkilib birinci dəfəymiş kimi öz  aralarında Əyyub Qiyasın istedadını çək-çevir edirdilər. Kino yaradıcılığından başlayan söz-söhbətdə “sonuncu büt”dən-daha dəqiqi nasirliyindən başqa hər şeydən danışırdılar. Səhnələşdirilən pyesləri, şeir yaradıcılığı, yaxşı dost olmağı, istedadı… Əyyub müəllimin  də hərdən gülümsəməyini  “qarasınca” deyilənlərə qulaq verib aldığı təəssüratlarının  ifadəsi kimi də başa düşmək olardı.

Saat 12:00 təyin olunan imza mərasiminin  nə qədər gecikdiyini  dəqiqləşdirə bilməsəm də, tədbirin  aparıcısı  Elçin Hüseynbəylinin perpendikulyar  kölgəsinin ayaqlarına çatmağına  lap az qalmışdı. İmza günü tədbirlərinin Azərbaycan Yazıçılar Birliyinin təşəbbüsü ilə keçirildiyini deyən cənab Hüseynbəyli bu qəbildən olan  tədbirlərin  ədəbiyyatın inkişafı, qələm adamlarının təbliği kimi əhəmiyyətindən danışdı. İmza günlərinin keçirilməsi  ənənəsinin davamlı olacağını qeyd edib sözü tənqidçi Vaqif Yusifliyə verdi.

Vaqif müəllim  Əyyub Qiyas haqqında xeyli xoş söz deyib   şəninə təriflər söylədi. “ Əyyub Qiyas  istedadlı yazıçıdır.Dəyərli,keyfiyyətli əsərləri var.Şeirlərində də özünəməxsusluğu hiss olunur”

Hörmətli filologiya elmləri doktoru çıxışının  son akkordlarını aşağı dozalı tənqidlər üzərində tamamladı. ““Sonuncu büt” romanında razılaşmadığım məqamlar var. Kino sahəsində  müəyyən uğurları olsa da, mən onu nasir kimi qəbul edirəm”

Elçin Hüseynbəylinin Mirmahmud ağa kimi təqdim etdiyi KXCP-nin sədri Mirmahmud Fəttah lap qədimdən başladı. Əyyub müəllimin  uşaqlıq illərindən, məktəbli yaşından, təzə-təzə şeir yazmağından danışıb onu “gözünün qabağında böyüyənlər” kateqoriyasına aid etdi. Kitab alacağını söz verib  Əyyub Qiyasın  könlünü şad eləmək istəyirdi ki, hardansa yadına “525-ci qəzet”i tərifləmək  düşdü. Dediyinə görə, baş redaktor  Rəşad Məcidlə aralarında olan soyuq münasibətə və mövqe fərqliliyinə baxmayaraq “525-ci qəzet” ölkənin bir nömrəli qəzetidir. İmza günləri haqqındakı reportajlardan ağız dolusu danışanda hərdən “gözünün quyruğu” ilə əlimdəki qeydlərə boylanan Aydın Xanın elə bil ki, qeybdən səsi eşidildi. Yox, əvvəlcə əlini ağzına söykədi ki, heç kim eşitməsin. Sonra KXCP-dən gələn tərifli günümüzə şad-xürrəm  olduğunu gizlətmədi: ”Sizi tərifləyir. Sizi tərifləyir”. Mirmahmud müəllimin Əyyub Qiyas haqqında dediyi səmimi sözlərdən valeh olan tədbir iştirakçılarının  tez-tez başlarını  tərpətməsindən razı qalan cənab sədr sözünü tamamladı.

İbrahim İbrahimlinin  dəli-dolu çıxışının dalınca  Bakı Uşaq Teatrının direktoru İntiqam Soltana söz verən Elçin Hüseynbəyli seminar müəllimləri sayaq “hazırlaşsın Səlim Babullaoğlu” deyəndə Səlim bəy gülə-gülə 2+1-in üzvü olan “müəlliminin”üzünə “ağ” oldu. İntiqam Soltan 11 dəqiqəyə yaxın odlu-alovlu, bəlağətli danışığında Əyyub müəllimlə dostuğundan,”sonuncu büt”ün ədəbi dəyərindən söz salıb 27 dəfə təşəkkür-minnətdarlıq etdi. Sonra Səlim Babullaoğlu Əyyub Qiyasın mifik-realizmindən başlayıb ədəbiyyat nəzəriyyəsinə qədər hər şey haqqında danışdı. Sən demə 20 gün əvvəl Sumqayıtda keçirilən tədbirdə də  qələm dostunun yaradıcılığı haqqında söz salıb.

Sonda Əyyub müəllim söz demək hüqundan istifadə edib tədbirdə  iştirak edənlərə, iş yoldaşlarına, tələbəlik dostlarına təşəkkürünü bildirdi. İmza gününün,”Bayatı” kitab mağazasının əhəmiyyəti haqqında söz salıb əlində kitab onu gözləyən oxucularına imza “hədiyyəsi” etdi.